Әр заманда елінің мақтанышы болатын дәуір перзенті болады. Қазақтың бағына біткен сондай өнерпаздың бірі – Димаш Құдайберген. Өткен апта АҚШ-тың Лас-Вегас қаласындағы (Невада штаты) T-Mobile Arena сарайында үлкен спорт додасы өткенінен бәріміз хабардармыз. Отандасымыз Геннадий Головкинге бір жағынан тілекші болған, бір жағынан ел намысын қорғап, Мемлекеттік әнұранымызды шырқаған әнші Димаш көрермен қошеметіне бөленді.
Халқымызда «төбем көкке бір елі жетпей тұр» деген жақсы сөз бар. Кеудені қуаныш пен мақтаныш кернегенде айтылатын орайлы сөз. Жерлесіміз ұлтына деген құрметін, махаббатын әнұранмен жеткізгенде, алып аренада таңданбаған көрермен қалмаған шығар. Тіпті тікелей эфирде тамашалған әлемдік жанкүйерлер Димашқа деген ықыласын, лебізін тоқтаусыз жаудырып жатты. Бұл мақтаныш қой! Үстіне киген қазақы шапаны да өзгелерден даралап тұрды. Әнұранда айтылған:
«Гүлің болып егілемін,
Жырың болып төгілемін, елім!
Туған жерім менің – Қазақстаным!» деп өсер жас ұл-қызымыз көп болсын! Шын мәнінде, өнер біріктіреді, адамдарды жақындастырады. Жасай бер, қазақтың Димашы!